នារសៀលថ្ងៃទី២០ ខែវិច្ឆិកា ឆ្នាំ២០២៣ គណៈប្រតិភូគណៈកម្មការកិច្ចការបរទេស សហប្រតិបត្តិអន្តរជាតិ ឃោសនាការ និងព័ត៌មាននៃព្រឹទ្ធសភា (ហៅកាត់គណៈកម្មការទី៥) ដឹកនាំដោយ លោកជំទាវកិតិ្តនីតិកោសលបណ្ឌិត ទី បូរ៉ាស៊ី ប្រធានគណៈកម្មការ បានអញ្ជើញទស្សនកិច្ចប្រាសាទកោះកេរ្ត៍ ស្ថិតនៅក្នុងភូមិស្រយ៉ង់ខាងជើង ឃុំស្រយ៉ង់ ស្រុកគូលែន ខេត្តព្រះវិហារ ។ប្រាសាទកោះកេរបានចុះបញ្ជីជាសម្បត្តិបេតិកភណ្ឌពិភពលោក និងស្វែងយល់អំពីការគ្រប់គ្រង កិច្ចអភិរក្ស និងការអភិវឌ្ឍវិស័យទេសចរណ៍។ ប្រាសាទកោះកេរមានចម្ងាយប្រមាណ១២០គីឡូម៉ែត្រពីទីរួមខេត្តសៀមរាប និងប្រមាណ៦០គីឡូម៉ែត្រពីទីរួមខេត្តព្រះវិហារ ប្រាសាទកោះកេរមានរូបរាងជាពីរ៉ាមីត កសាងឡើងក្នុងរជ្ជកាលព្រះបាទជ័យវរ័្មនទី៤ ឧទ្ទិសថ្វាយព្រះឥសូរតាមបែបព្រហ្មមញ្ញសាសនា ប្រាសាទនេះមានទំហំផៃ្ទដី ១៦គីឡូម៉ែត្រការ៉េរួមមាន៩៨ប្រាសាទ មាន៧ជាន់ និងមានកម្ពស់៣៥ម៉ែត្រ។
ដើម្បីការអភិរក្ស និងថែរក្សាឱ្យបានកាន់តែដិតដល់និងមានប្រសិទ្ធភាព តំបន់កោះកេរ្តិ៍ ត្រូវបានរាជរដ្ឋាភិបាលកម្ពុជា រៀបចំឯកសារដើម្បីស្នើសុំដាក់បញ្ចូលទៅក្នុងសម្បត្តិបេតិកភ័ណ្ឌពិភពលោក ហើយប្រាសាទកោះកេរ ត្រូវបានចុះបញ្ជីជាសម្បត្តិបេតិភណ្ឌពិភពលោកនៅថ្ងៃទី១៧ ខែកញ្ញា ឆ្នាំ២០២៣ ក្នុងកិច្ចប្រជុំរបស់អង្គការយូណេស្កូ នៅទីក្រុងរីយ៉ាដ ប្រទេសអារ៉ាប៊ីសាអូឌីត។
ប្រភព៖នាយកដ្ឋានព័ត៌មាន